AULA DE TEATRO Sei San Narciso: abril 2025

REINCORPORÁMONOS Á XXV MOSTRA DE TEATRO DE ENSINO SECUNDARIO DO MORRAZO NO 2023

IN MEMORIAM: BRAIS SESTELO

No día de representación na XXV MOTESMO en Bueu

A AULA DE TEATRO SEI SAN NARCISO VOLVEU Á MOSTRA DE TEATRO DO ENSINO SECUNDARIO DO MORRAZO NA SÚA XXV EDICIÓN

A nosa Aula de Teatro embarcou de novo na Mostra do Teatro de Ensino Secundario do Morrazo, coincidindo co XXV aniversario desta marabillosa creación colectiva que distintos centros da comarca impulsaran e que como fundadores contribuímos no seu día a poñer en pé alimentándoa curso a curso durante unha longa etapa que chegou ata o 2011.

Na cerimonia de inauguración da XXV MOSTRA DE TEATRO en BUEU

Pasada máis dunha década volvemos no 2023 con moita ilusión e trouxemos a esta edición unha marca habitual da casa, un espectáculo da nosa autoría que quere ser á vez unha homenaxe á propia traxectoria da nosa aula reunindo nesta obra unha serie de chiscadelas e referencias escénicas ás montaxes de anos atrás, o que non quere dicir que a trama deixe de ser completamente nova e orixinal.

Representación na MOTESMO en Bueu

Quixemos deste xeito reunir diversos elementos botando man de múltiples técnicas que nos caracterizan como son: A dramatización de textos narrativos (usamos unha longa e coñecida novela, As intermitencias da morte do Premio Nobel J. Saramago e un conto lostregante, A Illa das mulleres, da autora marinense Lara Dopazo) introdución da lírica de poetas vivos e mortos, esta vez ata nos atrevemos cos discursos da promotora dos venres polo planeta, incorporamos, como non, música en directo, mesmo montaxes audiovisuais, algo de danza inspirados en montaxes de Pina Baush e Dimistris Papanaiou, ecos de grandes escenas clásicas do cinema como escenas inesquecibles do Gran Ditador de Charles Chaplin ou de literatura infantil (Alicia) como se reflicte no propio título O Futuro ao outro lado do espello.

É unha obra que se estreou o 28 de abril no Salón de Actos do IES Xohán Carballeira de Bueu, sé da Mostra de Teatro de Ensino Secundario na presente edición. Os espectadores presenciaron logo unha sucesión de imaxes escénicas diversas que denominamos: Camiñamos, Escoitando a Terra, Cambio Climático, Traballo, Morte e Amor, Illa das Mulleres e o Futuro ao outro lado do espello. Son sete grandes escenas coas que pretendemos interpelar os medos ao porvir, ao mesmo tempo que, como persoas en formación, nos respondemos a nós mesmas sobre as interrogantes do noso futuro.

ELENCO VER O VÍDEO DA REPRESENTACIÓN EN BUEU

MULLERES ANTE O ESPELLO: Rocío López (ALICIA), Carla Núñez (MORTE MOURA) Greta Sampedro (MORTE BRANCA), Alba Capa (xornalista), Mar Madero (xornalista), Claudia Cárcer (xornalista), Sara Fraile (xornalista), Cristina Boullosa, Sara Catalán e Kelly González.

HOMES ANTE O ESPELLO: Óscar Mathieu, Brais Sestelo, David Fuentes (xornalista), Alex Díaz e Iago Otero.

MÚSICAS ANTE O ESPELLO: Ainhoa del Río, Uxía Novegil.

MONTAXE AUDIOVISUAL: Luís Fuentes

LUZ: Antía Argibay

SON: Breixo Pazos

ESCENOGRAFÍA: Darío Suárez e Teresa González

ADAPTACIÓN DOS TEXTOS E DIRECCIÓN: Héctor Silveiro

Representación no noso centro

Programa da XXV MOTESMO

PEQUENO ÁLBUM FOTOGRÁFICO

Máis información

A NOSA MONTAXE PARA A MOTESMO 2025: HIPOCRISÍA

Seica a hipocrisía levou á humanidade a imaxinar entre outras cousas un paraíso, seguramente para esquecer o inferno no que vivimos porque, como xa alguén deixou dito, “esoutro inferno do Máis Alá, non existe. O odio, a crueldade, iso é o inferno. Ás veces, o inferno somos nós mesmos”.

HIPOCRISÍA é unha obra de creación propia que fomos compoñendo cos recortes da lamentable actualidade. Parte do Paraíso ata chegar ao abismo ou, se queres, ao Inferno do Necrocapitalismo. A mazá do inicio simboliza logo o desenvolvemento natural do planeta no que se asentou cos seus defectos a ambiciosa humanidade cunha vontade transformadora, pero o encontro resultou perverso porque axiña emerxen entre as xentes inocentes, a culpa e o pecado (os sete pecados capitais serán fíos condutores da trama: Luxuria, avaricia, envexa, soberbia, preguiza, gula e ira), mais o principal motor é, como non, a hipocrisía, a mentira que goberna o mundo, que se vai apoderando estrepitosamente das relacións das persoas que viven de cote baixo a máscara e asediadas sempre polas verdades incómodas.

A etimoloxía da palabra lévanos á antiga Grecia onde naceu o teatro no que os “mestres da verdade” atoparon esta ferramenta para observar o mundo e os seus conflitos, para realizar unha crítica radical baixo a protección da máscara.

Propoñemos, pois, unha viaxe áxil, vertixinosa e crítica pola historia da humanidade ata petar de cheo coa máis rabiosa e desagradable actualidade, esa que nos abafa e preocupa, esa que, deste xeito en sete escenas simplificamos e denunciamos, mesmo a cara descuberta, invitando á reflexión co sincero convencemento de que é posible, aínda que non o pareza, un mundo mellor.

ACTÚAN BAIXO AS MÁSCARAS,

ENTRE O PARAÍSO E O INFERNO,

ANTE O ESPELLO DO MUNDO QUE É O TEATRO:

Ainhoa del Río

Carmen Estévez

Emma Freire

Alejandra Area

Ana González

Uxía Novegil

Dani Balagones

Simón Brea

Leonor Blanco